«WorldSkills»ның ачылу тантанасы стадионда узачак

WorldSkills стандартлары буенча дөнья чемпионаты дөньяның 60тан артык иленнән яшь профессионалларны җыячак, катнашучылар 56 компетенциядә ярыша. 24 мең кеше кабатланмас тамашаны күрә алачак – Үзәк стадион шулкадәр тамашачы сыйдыра ала. Чемпионатны уздыру тәҗрибәсендә беренче тапкыр дөнья чемпионатын ачу тантанасына катнашучылар гына түгел, казанлылар да, башкала кунаклары да бара ала.

– Стадионның сыйдырышлыгы 24 мең кеше, шуларның 12 мең урыны WorldSkills клиент төркеме өчен, билетларның калган өлеше тамашачыларга бирелә, – дип сөйләде Илсур Метшинга Спорт һәм социаль проектлар дирекциясе генераль директоры урынбасары Михаил Леонов һәм ул аның WorldSkills International өчен беренче тәҗрибә икәнлеген, элек ачылыш тантанасына билетлар сатылмавын әйтте.

Ачылыш тантанасы өч сәгать дәвам итәчәк, анда эләкмәүчеләр өчен интернетта турыдан-туры трансляция оештырыла. Михаил Леонов сүзләренә караганда, 500ләп артист катнашкан тамаша төрле махсус эффектларга һәм интерактив вакыйгаларга бай булачак.
Михаил Леонов шулай ук Үзәк стадионда масштаблы чарага әзерлек барышы турында сөйләде. Мәйданчыкта инженерлык челтәрләрен һәм Үзәк стадионның кайбер объектларын ремонтлау планлаштырыла. Казан мэры билгеләп үткәнчә, ремонт эшләре вакытында югары сыйфатлы материаллар кулланылырга тиеш.

– Үзәк стадионда зур күләмле чаралар – Россия чемпионатлары, Европа Кубоклары уза, монда тренировкалар базасы булырга тиеш, – дип ассызыклады Илсур Метшин.
Исегезгә төшерәбез: WorldSkills 45нче дөнья чемпионаты Казанда 2019 елның 22-27 август көннәрендә узачак.