“XX гасыр үләте” белән авыручылар саны буенча Әлмәт беренче урында тора

Европада XIV гасырда күзәтелгән үләт (чума) 34 миллион кешене кырып салган булган.
- Бөтендөнья Сәламәтлек саклау оешмасы белдергәнчә, СПИД та "XX гасыр үләте". Дөньяда 1981 елдан бирле 34 миллион кеше шушы авырудан үлгән, - диде шәһәр башкарма комитетының сәламәтлек саклау идарәсе җитәкчесе Илнур Хәлфиев "эшлекле дүшәмбе" киңәшмәсендә.

Бу ерак материклардагы чир, безгә янамый, дип, үзебезне һич тә тынычландыра алмыйбыз. Россиядә 824 мең 706 кеше СПИД-ВИЧ инфекцияле.
- Казанда ВИЧ инфекцияле 4867 кеше медицина исәбендә тора. Быелның ун аенда шушы төрдәге авырулар саны тагын 369 кешегә артты,- диде Илнур Хәлфиев.

Татарстанда ВИЧ таралышы буенча күңелсез исемлекнең башында Әлмәт шәһәре тора. Аннан соң Чаллы һәм Казан. Илнур Хәлфиев әйткәнчә, ВИЧ инфекциясе кешегә 63 процент очракта җенси мөнәсәбәтләр аша йога. Шуны онытмыйк: котылгысыз үлемгә илтүче бу авыруга әлегә дару-дәва юк.