Яхшылык эшләү берләштерә

Бәйгегә барлыгы 60тан артык гариза кабул ителгән. Сайлап алу турларын 23 кандидат узган. Шигырь укучыларны сайлаганда артистлыкка, текстны дөрес итеп сөйләүгә, үзенчәлекле балалар белән эшләргә теләү, сәнгатьле уку кебек сыйфатларга да игътибар иткәннәр. Сайлап алынган шигырь укучылар профессиональ мастер-класслар узганнар.

Ораторлык осталыгы буенча курс авторы мөгаллимә Вероника Чепегина укучыларга дикцияне яхшырту, сәнгатьле сөйләү буенча киңәшләрен биргән, күнегүләр өйрәткән. Физик яктан мөмкинлекләре чикле балалар белән эшләү үзенчәлекләренә педагогика фәннәре кандидаты, доцент, психолог Фирүзә Саглам өйрәткән. Вакыйганы тулырак күзаллау өчен, мастер-классларда балалар курчаклар ярдәмендә катлаулы моментларны анализлаганнар.

Психик, физик яктан тайпылышлар күзәтелгән үзенчәлекле балалар өчен шигырьләр уку, китаплар дөньяга тәрәзә ачу кебек. Дөрес сайланган әдәбият, системалы төстә китаплар уку, әсәрләрне анализлау балалар өчен бик файдалы, сәламәтлекләренә уңай тәэсир итә. «Киң күңелле волонтер шигырь укучылар проект кысаларында балаларны төрле яклап үстерүгә өлешләрен кертәләр», – ди Фирүзә Саглам. Волонтерлар үзләре дә әлеге проектта катнашуларына бик шат. «Балаларга йөрәк җылымны бирергә телим, аларның бәхетле елмаюларын күрәсем килә», – ди сайлап алу турларын узган Таңсылу Сибгатуллина. Волонтер Денис Галичинның да төп максаты – китаптагы гадәти булмаган, кызыклы дөньяны балаларга ачу, аларда китапка мәхәббәт уяту.

«Менә дигән укулар» проекты төрле һөнәр ияләрен, төрле яшьтәге кешеләрне җыйды. Әмма аларны бер нәрсә берләштерә – яхшылык эшләү һәм башкаларга ярдәм итү.