Ялган аракы турында “Халык контроле”нә хәбәр ит

"Халык контроле" порталында яңа бүлек барлыкка килде. Анда алкоголь эчемлекләр сатуга кагылышлы кагыйдә бозулар турында аноним рәвештә хәбәр салырга мөмкин.

Бүген әлеге яңалык турында журналистларга тәфсилләп Татарстанда кеше хокуклары буенча вәкаләтле вәкил Сәрия Сабурская сөйләде. Аның сүзләренчә, "Халык контроле" системасына шикаятьләр, зарлар агылганнан-агыла тора. Узган елның августында 1509 мөрәҗәгать кабул ителсә, бу елның шушы ук аенда - 4438 шикаять.

- Яңа бүлеккә ялган спиртлы эчемлекләр әзерләү, сату турында хәбәр итәргә мөмкин. "Халык контроле"нең башка бүлекләреннән аермалы буларак, монысы ябык булачак. Аның өчен Татарстанның Эчке эшләр министрлыгы җаваплы, - диде Сәрия Сабурская.

"Халык контроле" порталының яңа сәхифәсенә инде 26 мөрәҗәгать килеп ирешкән. Әйтик, Казанның Мәүлетов урамындагы базарында, "Августина" кибетендә алкогольнең кичке уннан соң сатылуы турында хәбәр килеп ирешкән.