Ялкын котырса, кешене танымый

Минзәлә районындагы янгын фаҗигасен, ачы мисал сыйфатында, кабат искә төшереп үтик. Анда ике кечкенә бала янгын корбаны булды.

- Ана кеше ике баласын өйдә ялгызларын гына калдырган. Шул вакытта янгын чыккан. Бичара сабыйлар болконга качырга тырышкан, тик барыбер янып үлгәннәр,-дип, авыр көрсенеп мисал китерде Россия Гадәттән тыш хәлләр министрлыгының Татарстан буенча баш идарәсенең тикшерүләр һәм административ чаралар бүлеге җитәкчесе урынбасары Максим Әскаров “Татар-информ” мәгълүмат агентлыгында узган матбугат конференциясендә.

Кечкенә балаларны өйдә үзләрен генә һич бер вакытта да ялгызларын калдырмаска киңәш итте МЧС вәкиле. “Күршеләрнең күз-колак булып торуын үтенергә, ахыр чиктә ишекне бикләмәскә кирәк”,-диде ул. Сабыйларга шырпы тоттырырга, мичтә яки газ плитәсендә ут кабызырга рөхсәт бирергә ярамый.
Республикада ел башыннан 29 ноябрьгә кадәрге чорда 2819 янгын теркәлгән. Ут 131 кешене корбан иткән, шуның дүртесе-балалар, ә 231 кеше төрле төрле дәрәҗәдә тән пешүләре алган.
Янгыннарның 77,6 проценты шәхси секторга туры килә.

- Кышкы айларда мич актив кулланыла. Мичне акшарлап-агартып тору зарур, ак яссылыкта төтен чыккан ярыклар ачык күренә. Ярыкларны измә белән сылагыз. Мич инде нык тузган һәм кирпечләре уала башлаган очракта, андый мичтән файдаланмагыз, - дип киңәш итте Максим Әскаров.
Спиртлы эчемлекләр кулланган вакытта өй-фатир эчендә, аеруча урын-җир өстендә, тәмәке тартырга ярамый. Медицина экспертизасы ачыклаганча, янгында үлгән 65 кеше исерек халәттә булган, шуларның 29ы исерек хәлдә йоклап киткән.

Татарстан Республикасы Президенты теләктәшлегендә күп балалы гаиләләргә, Бөек Ватан сугышы ветераннарына, инвалидларга бушлай янгын хәбәр салгычы (автономный пожарный извещатель) бирелә. Республика буенча 8330 өйгә һәм фатирга 29 мең 780 шундый аппарат куелган инде. Әлеге “чыелдык” ярдәмендә 2016-2018 елларда янгыннардан 43 кеше котылып калган. Быелның 11 маенда Лениногорск районының Федотовка авылында янгын булган. “Янгын хәбәр салгычы чыелдый башлагач, җиде баланы ияртеп, урамга йөгердем”,-дигән хуҗабикә. Аппарат чыелдавын күршеләре дә ишетеп, шулай ук урамга чыккан.

МЧС кисәтә:

Ватылган яки җимерелә башлаган мичләрдән, газ плитәләреннән файдаланмагыз;

Газ исе таралаган очракта шырпы яндырмагыз, электр уты кабызгычына басмагыз;

Газ аппаратларын үз белдегегездә төзәтмәгез, белгеч чакыртыгыз;

Кулдан ясалган электр җылыткычлары ышанычлы түгел, заводта ясалганнарны гына кулланыгыз;

Бер розеткага берничә электр приборы тоташтырмагыз;

Мич янган яки газ плитәсе эшләгән вакытта кечкенә балаларны үзләрен генә калдырмагыз.

Ут чыганагына һәрвакыт сак булыгыз!

Автор фотолары