Югалган авыллар исеме мәңгеләштерелә

Кешеләр генә түгел, авыллар да төрле язмышлы булалар. Бик бәхетле, уңышлылары янәшәсендә күп сынаулар узганнары, бетеп югалганнары, юкка чыкканнары да да бар. "Аларны да хәтерләргә, онытмаска кирәк, чөнки алар да кемнәрнеңдер кече Ватаны", - диләр, - Буа якташлык җәмгыяте вәкилләре. Татарстан республикасының 100 еллыгы кысаларында Буа районында җир йөзеннән югалган авыллар исемен киләчәккә илтер өчен алар урынына истәлек билгеләре куя башлаганнар. Быелгы Җиңү бәйрәме алдыннан тагын шундый өч авыл Ягодная, Петровка Олы Фролово Выселкасы урыннарына истәлек һәйкәлләре ачылды.

Аларның мәрмәр плитәләренә  сугышта һәлак булган һәм исән кайтып та инде бакыйлыкка күчкән ветеран авылдашларының исем - фамилияләре уелган. "Әгәр дә сугыш булмаган һәм шушы ир-атлар Ватан азатлыгы өчен башларын салмаган булсалар, әлеге авыллар да исән булыр иде..." - дигән уйны уйлата һәм сугышка нәфрәт уята әлеге һәйкәлләр. 4 ел эчендә барлыгы 16 шундый истәлек һәйкәле куелган Буа районында. Якташларым бу авыллар вәкилләренә туган җирләренә кайтып, дога, гыйбадәт кылырга мөмкинлек тудыра торган бик изге гамәл башкарганнар. Әйе, беркем дә, берни дә онытылырга тиеш түгел.

—  Бу эшебезне, югалган авыллар урынына һәйкәлләр куюны киләчәктә дә, ел саен дәвам итәчәкбез, - диде Буа якташлык җәмгыяте президенты Ирек Закиров. - Һәркемнең ата-бабаларын искә алыр өчен кайтыр урыны булырга тиеш.

Хак сүзләр. Ләкин шулай да, югалган авылларның да, аларга куелган истәлек-һәйкәлләренең дә мөмкин кадәр азрак, ә инде гөрләтеп яшәүче салалар саны күбрәк  булсын иде.