ЮХИДИ хезмәткәрләре балконнан сикереп төшәргә җыенган 26 яшьлек кызны коткарганнар

Патрульлек иткән вакытта инспекторларның рациясенә Яшел Үзән шәһәре йортларының берсендә бер кызның 8 нче каттан сикерергә җыенуы турында мәгълүмат килеп ирешә. Хезмәткәрләр кичекмәстән вакыйга урынына килеп җитәләр. Полиция капитаны Евгений Зинин 8 катка йөгерә, шул арада өлкән инспектор Юрий Карасев биредәге хәлләр турында полициянең дежурына хәбәр итәргә кала.

Тормыш белән исәбен өзәргә җыенган кыз белән әңгәмә вакытында Евгений аны әлеге гамәленнән ваз кичергә чакыра. Озак кына үгетләүләрдән соң, кыз әлеге уеннан кире кайта һәм подъездга керә.

Каза урынына ашыгыч ярдәм бригадасы һәм Гадәттән тыш хәлләр министрлыгы хезмәткәрләре килеп җитә, алар кызга медицина һәм психологик яктан ярдәм күрсәтә. Әлеге хәлнең барлык шартлары ачыклана, дип хәбәр иттеләр безгә Россия Эчке эшләр министрлыгының Яшел Үзән районы буенча бүлеге матбугат хезмәтендә.

Россия Эчке эшләр министрлыгының Яшел Үзән районы буенча

бүлеге матбугат хезмәте фотолары.