Үз фатирын шартлату белән янаган казанлыны нинди җәза көтә?

25 июнь көнне иртәнге сигезләр тирәсендә казанлының өенә санитар эшкәртү өчен ялланган хезмәткәрләр белән бергә суд приставлары килгән. Әмма ир-ат өченче каттагы фатирга кереп бикләнгән һәм аны шартлату белән янаган. Подъездда яшәүчеләрне иртәнге тугызлар тирәсендә эвакуацияләгәннәр, ләкин кайбер фатирларда урыныннан тора алмаучы авырулар калган.

Шул йортта яшәүчеләр сүзләренчә, ир-ат сигез ел дәвамында үз фатирында чүп җыя, аны җыештыру үтенеченә дә колак салмый. Тирә-юньгә сасы ис таралган.
"Бүген приставлар торакны чистарту боерыгы белән бирегә килделәр. Әмма ул аларга ишекне ачмады һәм үзен агрессив тота башлады", - дип сөйләгән журналистларга шул өйдә яшәүче хатын.

Аның сүзләренчә, приставлар ир-ат янына беренче тапкыр гына килми. Әле узган елның октябрендә үк шул йортта яшәүчеләр хокук саклау органнарына мөрәҗәгать иткән, шуннан соң суд ир-атны чүп-чарларны җыештырырга мәҗбүр иткән.

Полицейскийлар, Росгвардия хезмәткәрләре ярдәме белән, хокук бозучы йортына керә алган, анда кинологлар һәм саперлар тикшерү уздырган. Фатирда шартлаткыч матдәләр табылмаган. Алга таба тикшерү өчен ир-ат полиция бүлегенә китерелгән.