«Земский доктор» программасы буенча Кайбычка 17 табиб кайткан

Республиканың бер генә районы да бу хәтле зур күрсәткеч белән мактана алмый торгандыр. Кайткан табибларны эшле генә түгел, йортлы-җирле дә итәләр, хөрмәтен дә күрсәтә беләләр. Табиблар өчен йортларны җиткереп куйганнар, рәхәтләнеп яшә дә тынычлап эшлә.

– Соңгы дүрт ел эчендә Кайбыч районында халыкның сәламәтлеген кайгырту буенча әйтеп бетергесез күп эшләр башкарылды. Хастаханәләр дә ремонтлана, бүгенге көндә бөтен белгечләребез бар. Эшләргә күңелле, – ди район хастаханәсенең баш табибы Гөлнара Сафиуллина.
Күптән түгел Чәчкаб авылында да фельдшер-акушерлык пункты ачылды. Авыл фельдшеры Люция Сафина: «Нинди генә сорау белән мөрәҗәгать итсәләр дә, без ярдәм итәргә әзер», – дип тора.

Чәчкаб авылындагы ФАП – район буенча сигезенчесе, ул 426 кешегә хезмәт күрсәтәчәк. Бүлмәләр шактый иркен, кирәкле бөтен җиһазлар да бар. Районның үзәк хастаханәсеннән килгән табиблар да авыл халкын биредә кабул итәчәк.

Зөлфия Хәлиуллина, Кайбыч.