1 августтан кемнәрнең пенсиясе артачак: өстәмә алу өчен гариза бирергә кирәкми

Нәтиҗәдә күпчелек алучыларның пенсияләре 17,3 процентка, ә аерым категория гражданнарныкы 19,3 процентка артачак.

Бу хакта Россия Дәүләт Думасының Хезмәт, социаль сәясәт һәм ветераннар эшләре комитеты әгъзасы Екатерина Стенякина хәбәр иткән.

Аның сүзләренә караганда, 19,3 процент күләмендәге өстәмә тупланма пенсияләрен ирекле рәвештә формалаштырган гражданнарга кагыла. Алар арасында пенсия тупланмаларын дәүләтнең бергәләп финанслау программасы буенча тулыландырган, шулай ук ана капиталы акчасын тупланма пенсиягә юнәлткән кешеләр дә бар.

17,3 процент күләмендәге индексация пенсия тупланмаларын инвестицияләү нәтиҗәләре нигезендә исәпләнгән. Белдерелгәнчә, 2025 ел нәтиҗәләре буенча инвестиция кереме инфляция дәрәҗәсеннән өч тапкырга югарырак булган.

Яңадан исәпләү якынча 136 мең кешегә кагылачак. Пенсия күләме автомат рәвештә артачак, шуңа күрә өстәмә алу өчен гариза язарга кирәкми.