100 мең сум пенсия алып буламы? Була, әгәр...

Россиялеләр 230 мең сум хезмәт хакы һәм 53 ел стаж булганда 100 мең сум пенсиягә исәп тота ала, дип сөйләгән РИА Новостига Мәскәү өлкәсе Думасы депутаты Анатолий Никитин.

"Пенсиядә 100 мең сум түләү алу өчен гражданин индивидуаль пенсия коэффициентының 630 баллын тупларга тиеш. Пенсиягә чыкканчы 43 ел һәм аннан соң 10 ел стаж кирәк - махсус премиаль коэффициент өстәлә, һәм индивидуаль пенсия коэффициенты баллары 2,32 гә тапкырлана", - диде Никитин.
Депутат шулай ук югары түләүләр россиялеләрнең аерым категорияләренә дә мөмкин булуын искәртте.

"Мәсәлән, 35 ел хезмәт иткән хәрби үзенең вазыйфасы буенча окладтан, хәрби звание буенча окладтан һәм тиешле еллар хезмәт иткән өчен айлык өстәмә түләүдән максимум 85 процент түләү ала алачак. Ягъни, пенсия 100 мең сум булсын өчен, аена 120 мең сум акча түләнергә тиеш — мәсәлән, контрактчылар, очучы-сынаучылар, космонавтлардагы кебек. Кайбер РФ геройларының пенсиясе 100 мең сум һәм барлык ташламаларны исәпкә алып югарырак", - дип аңлатты парламентарий.

Никитин искә төшергәнчә, гражданнар лаеклы картлык турында үзләре кайгырта ала.
"Әгәр дә дәүләтнеке булмаган фондларга 30 яшьтән 5 мең сумга кадәр акча кертеп барсаң һәм беренчел взнос буларак 100 мең сум күчерсәң, пенсиягә чыкканнан соң айлык өстәмә түләү 10 ел дәвамында якынча 40 мең сум тәшкил итәчәк. Шул рәвешле, әгәр индивидуаль пенсия коэффициенты 300 балл җыйсаң, суммада якынча 100 мең сум булачак", — диде парламентарий.