16 яшьлек кыз һәлак булган авария өчен18 яшьлек егет суд каршына басачак

Бу хакта Россия Тикшерү комитетының Татарстан буенча Тикшерү идарәсе хәбәр итте.

Тикшерү мәгълүматларына караганда, егеткә юл хәрәкәте кагыйдәләрен бозып, саксызлык аркасында кеше үлеменә китерүдә, ике пассажирның сәламәтлегенә авыр зыян салуда, шулай ук автомобильне рөхсәтсез файдалануда гаепләү белдерелгән.

Фаҗига 26 апрельдә «Татар Әҗәле – Мамадыш – Әкил» автомобиль юлының 3нче чакрымында була. Тикшерү версиясе буенча, исерек хәлдәге яшь егет, транспорт чарасы белән идарә итү хокукына ия булмыйча, Renault автомобиле белән югары тизлектә хәрәкәт иткән. Ул идарәне югалтып юл читендәге киртәгә бәрелгән, аннары автомобиль түбәсе белән әйләнеп капланган.

Авария нәтиҗәсендә 16 яшьлек кыз урында ук диярлек һәлак була. Автомобильдә булган 13 һәм 14 яшьлек тагын ике яшүсмер төрле тән җәрәхәтләре белән хастаханәгә озатыла.

Тикшерүчеләр ачыклаганча, юлга чыгар алдыннан егет әтисенең автомобиленнән ачкычны рөхсәтсез алган һәм биш балигъ булмаган пассажир белән йөрергә чыккан.

Хәзер җинаять эше судка җибәрелгән. Егетнең гамәлләренә хокукый бәяне суд бирәчәк.