23 февраль алдыннан мошенниклар активлашкан

Сатып алучы булмаган товар өчен акча күчерә. «Акция» уздырганнан соң исә, сайт юкка чыга, дип кисәтә интернет-аналитик, “Газинформсервис” компаниясе эксперты Марина Пробетс.

Моннан тыш, алдарлар смс һәм электрон хатлар ярдәмендә фишинг һөҗүмнәр үткәрә. Бу хәбәрләрдә банк яки популяр интернет-кибет сайтын алыштыра торган ялган сайтка сылтама була. Акциягә кушылу яки бүләк алу өчен, логин, парольләрне һәм банк карталары мәгълүматларын кертергә кирәк. Ахыр чиктә, мошенникларның аккаунтларга керү мөмкинлеге барлыкка килә, димәк, алар аның аша акча урлый ала.

Бүләк оту турындагы ялган хәбәрләр һаман да иң гади, ләкин нәтиҗәле алдау ысулы булып кала: мошенниклар янәсе 23 февраль уңаеннан җиңгән приз турында хәбәр итә. “Отыш”ны алу өчен корбаннан “комиссия”, “салым” яки “китереп җиткерү” өчен түләүне сорыйлар. Акча күчергәннән соң мошенниклар юкка чыга. 

- Әмма бу гына түгел әле, мошенниклар еш кына ватанпәрвәрлек хисен һәм кешеләрнең ветераннарга һәм хәрбиләргә ярдәм итәргә әзерлегеннән файдаланалар. Алар күңелне нечкәртә торган тарихлар һәм фотосурәтләр кулланып, ялган хәйрия җыеннары оештыралар. Ышанучан гражданнар тарафыннан күчерелгән акчалар мошенникларның кесәләренә утыра. Мондый хәлләргә тарымау өчен акчаларны тикшерелгән хәйрия оешмаларына гына күчерергә кирәк”, - ди белгеч.

Белгечләр цифрлы гигиена кагыйдәләрен үтәргә киңәш итә: интернет-кибетнең абруен тикшерергә, башка сатып алучыларның фикерләрен эзләргә, сайт дизайнына һәм мәгълүматның сыйфатына игътибар итәргә, шулай ук артык түбән бәяләргә һәм артык “яхшы” тәкъдимнәргә ышанмаска. Моннан тыш, шикле хәбәрләрдәге сылтамалар буенча күчмәскә һәм тикшерелмәгән сайтларда шәхси мәгълүматларны кертмәскә киңәш ителә.