Абортлар кимегән: хатын-кызлар йөклелекне өзү ниятеннән баш тарта

Татарстан Республикасы Министрлар Кабинетында җәмәгатьчелек сәламәтлегенә багышланган төбәк советы утырышы узды. Анда катнашучылар ашыгыч медицина ярдәме һәм офтальмология хезмәте эшчәнлеген камилләштерү, иммунопрофилактика, шулай ук халыкның репродуктив сәламәтлеген саклау кебек төп юнәлешләргә тукталдылар.

Татарстан Республикасы сәламәтлек саклау министры урынбасары – Казан шәһәренең Сәламәтлек саклау идарәсе башлыгы Илназ Әхмәдиев белдергәнчә, соңгы биш елда медицина күрсәткечләре белән бәйле булмаган абортлар саны 4 тапкырга кимегән. Бу уңай күрсәткечкә ирешергә абортка кадәрге киңәйтелгән консультация системасы ярдәм иткән. Агымдагы елның гыйнвар–октябрь айларында хатын-кызларның 42 проценты кризислы йөклелек үзәкләре белгечләре белән сөйләшкәннән соң йөклелекне өзү ниятеннән баш тарткан.

Татарстан Премьер-министры урынбасары Ләйлә Фазлыева репродуктив сәламәтлекне саклау эшенең аеруча әһәмиятле булуын ассызыклады. Якын киләчәктә медицина оешмалары алдында йөкле хатын-кызларны күзәтүне көчәйтү, ведомствоара хезмәттәшлек нигезендә репродуктив диспансеризация үткәрү һәм гаилә кыйммәтләрен киң популярлаштыру бурычлары куелды.

Совет утырышында шулай ук Илкүләм прививкалар календарен үтәү, гриппка каршы вакцинация темпларын арттыру һәм халык арасында профилактик тикшерүләрне популярлаштыру мәсьәләләре дә каралды.