Апаста булачак әниләр белән очрашу үтте

Авырлы хатыннар көне уңаеннан Апас районы ГХАТ бүлегендә әни булырга җыенучы хатын-кызлар белән очрашу булды. Очрашуда табиблар, шәфкать туташлары белән бергә район башлыгының социаль мәсьәләләр буенча урынбасары Гөлүсә Галләмова, үзәк район хастаханәсенең баш табибы Алевтина Кәримова, социаль яклау бүлеге җитәкчесе Зөлфия Гайнуллина, ЗАГС бүлеге җитәкчесе Розалия Насыйбуллина катнашты.

Булачак әниләр бала көткәндәге һәм бала туганнан соңгы түләүләр, "Рождение ребенка" суперсервисы аша гариза бирү хакында күп мәгълүмат алдылар, баланы биләү буенча мастер-класс карадылар, педиатр яңа туган балаларны беренче айларында беренче планлы карау кагыйдәләре белән таныштырды. Чара азагында район социаль яклау бүлеге тарафыннан йөкле хатын-кызлар арасында оештырылган «Йөкле хатын-кыз - иң чибәре» онлайн-конкурсына йомгак ясалды. Бу вакыйга йөкле хатын-кызлар өчен бәйрәм генә түгел, тәҗрибә, белем һәм хис-кичерешләр алмашу өчен платформа да булды.

Татарстан Республикасы Министрлар Кабинетының

ЗАГС идарәсе матбугат үзәге