«Бала критик хәлдә, табиблар аның гомере өчен көрәшә. Хәзерге вакытта нәрсәдер фаразларга иртәрәк...»

Шәһәр администрациясе гаилә белән даими элемтәдә тора һәм медицина, социаль һәм юридик мәсьәләләр буенча ярдәм күрсәтә. Бу хакта «Татар-информ»га Яшел Үзән районы матбугат хезмәте җитәкчесе Регина Чибрикова хәбәр итте.

«Бала критик хәлдә, табиблар аның гомере өчен көрәшә. Хәзерге вакытта нәрсәдер фаразларга иртәрәк – барысы да Аллаһ кулында. Табиблар көчләреннән килгән кадәр барысын да эшли», - дип сөйләде ул.

Чибрикова сүзләренчә, баланың әнисе әлегә аралашырга әзер түгел, әмма хатын-кыз матбугат хезмәте аша сукбай хайваннар белән бәйле вазгыятькә карата үз позициясен җиткергән.

«Ул әни кеше буларак федераль законны яңадан карау үтенече белән мөрәҗәгать итүен җиткерүебезне сорады. Хәтта стерильләштерелгән һәм чип куелган этләр дә агрессив була ала, бигрәк тә көтү белән йөргәндә, диде баланың әнисе», – дип тапшырды матбугат хезмәте вәкиле.

Исегезгә төшерик, 28 ноябрьдә Яшел Үзән районының Васильево бистәсендә 9 яшьлек кызга этләр көтүе һөҗүм итте. 3 декабрьдә сукбай хайваннарны аулау өчен җаваплы оешма җитәкчесе белән хезмәткәрен кулга алулары билгеле булды. Бүген исә Әйшә авыл җирлеге советы депутаты тоткарланды, ул шулай ук җирле торак-коммуналь хуҗалык департаментын да җитәкләгән булган.

Чыганак: Татар-информ