«Цифрлы фикерләүле җитәкче кирәк»: НТР баш мөхәррире вазифасына бөтенроссия конкурсы игълан ителде

Җиңүчегә конкурентлы югары хезмәт хакы һәм торак белән тәэмин итү мөмкинлеге тәкъдим ителә.

Документлар 2026 елның 1 декабренә кадәр кабул ителә.

«Түбән Кама — информ» филиалы составына НТР телеканалы, радио һәм рус һәм татар телләрендә чыгучы ике газета керә. Яңа җитәкчегә әлеге редакцияләрнең эшен берьюлы координацияләргә, коллектив белән идарә итәргә һәм филиалның икътисадый тотрыклылыгы өчен җавап бирергә туры киләчәк.

Җитәкчедән цифрлы компетенцияләр көтәләр

«Татмедиа» АҖ генераль директоры Шамил Садыйков сүзләренчә, НТР — медиахолдингның иң зур һәм уңышлы филиалларының берсе. Тәҗрибәле коллектив һәм танылган бренд сакланып кала, әмма медианың үсеш юнәлешләре үзгәрә.

«Цифрлы трансформация вакыты җитте: редакция аналог телевидение тапшыруларында гына түгел, цифрлы чыганакларда, социаль челтәрләрдә һәм интернетта да актив эшләргә тиеш», — диде Шамил Садыйков.

Шуңа күрә конкурс кысаларында яңа медиа белән эшләү тәҗрибәсенә аерым игътибар бирелә. Кандидаттан онлайн-проектларны үстерү, социаль челтәрләр һәм мультимедиа юнәлешләрен нәтиҗәле алып бару осталыгы көтелә.

Шул ук вакытта традицион медиа — телевидение, радио һәм газеталарның үсеше дә җитәкченең төп бурычларының берсе булачак.

Җитәкченең бурычлары нинди?

Яңа баш мөхәрриргә:

* берничә редакция эшен координацияләргә;

* коллектив белән нәтиҗәле идарә итәргә;

* филиалның финанс-икътисадый тотрыклылыгын тәэмин итәргә;

* цифрлы һәм мультимедиа юнәлешләрен үстерергә;

* гамәлгә куючы, муниципаль органнар һәм реклама бирүчеләр белән хезмәттәшлек итәргә туры киләчәк.

Шамил Садыйков билгеләп үткәнчә, конкурсның бөтенроссия дәрәҗәсендә үткәрелүе заманча компетенцияләргә ия булган җитәкче табу мөмкинлекләрен киңәйтә.

Документларны ничек тапшырырга?

Кандидатларга таләпләр «Татмедиа» медиахолдингының рәсми сайтындагы «Конкурслар» бүлегендә урнаштырылган.

Документларны Казанда Декабристлар урамы, 2 нче йорт, 3 нче кат, 3 нче кабинетта эш көннәрендә 10:00–16:00 сәгатьләрдә кабул итәләр.

Документларны электрон почта аша да җибәрергә мөмкин: hr@tatmedia. com. Хат темасында «Конкурс баш мөхәррир» дип күрсәтергә кирәк.

Белешмәләр өчен: кадрлар сәясәте департаменты җитәкчесе Т. В. Пряслова, 8 (843) 222-09-84, өстәмә номер 1819.