Дәүләт Думасы балалы гаиләләр өчен ипотека каникулларын озайтты

Документ 2025 елның 1 сентябреннән үз көченә керә.

Яңа кагыйдәләр буенча, икенче бала яки аннан соңгы балалар туганда, заемщиклар ипотека түләүләрен вакытлыча туктатып тора алачак. Моның өчен гаилә кеременең кимүе исәпкә алынмаячак — хокук автомат рәвештә бирелә.

Уллыкка яки кызлыкка бала алган очракларда да шушы ук тәртип саклана: каникуллар бала гаиләгә алынган көннән башлап 18 ай дәвамында гамәлдә була ала.

Закон нигезендә төп бурыч буенча процентлар каникулларның җиденче аеннан гына исәпләнә башлаячак. Әмма аларны түли башлау каникуллар тәмамланганнан соң гына таләп ителәчәк.

Хәзерге гамәлдәге кагыйдәләр дә саклана: бала туганда ипотека буенча ярты елга кадәр каникуллар алырга мөмкин, әгәр заемщикның кереме 20% тан артыкка кимесә яки кредит йөкләнеше уртача айлык керемнең 40% тан артып китсә.

Яңа закон балалы гаиләләргә финанс йөкләнешен киметү һәм ипотека түләүләрен җайлаштыруны максат итеп куя.