Дәүләт Думасында 1 марттан нинди пенсияләр һәм түләүләр артачагын ачыкладылар

Дәүләт Думасы депутаты, бюджет һәм салымнар буенча комитет әгъзасы Никита Чаплин RT интернет басмасы белән әңгәмәдә 1 марттан гражданнарга социаль ярдәм күрсәтүгә кагылышлы төп үзгәрешләр, шул исәптән пенсияләр, пособиеләр һәм ташламалар бирү тәртибе турында сөйләде.

Депутат сүзләренчә, 1 марттан предприятие ябылу сәбәпле эштән куылган хатын-кызлар өчен йөклелек һәм бала табу буенча пособие сизелерлек артачак.
"Элеккеге 920 сум урынына пособие хәзер төбәктәге яшәү минимумына тигез булачак. Бу булачак әниләргә катлаулы тормыш ситуациясендә үзләрен якланганрак хис итәргә мөмкинлек бирәчәк", - дип билгеләде Чаплин.

Депутат шулай ук инвалидлыкны билгеләү өчен медик-социаль экспертиза системасындагы үзгәрешләргә игътибарны юнәлтте.

"Без максатчан тернәкләндерү төркемнәренең яңа системасына күчәбез, ул һәр пациентка индивидуаль якын килүне тәэмин итәргә мөмкинлек бирәчәк. Инвалид яки инвалид бала буларак тануның яңартылган критерийлары ярдәмгә мохтаҗлыкны төгәлрәк билгеләргә ярдәм итәчәк", - дип аңлатты депутат.

Чаплин сүзләренчә, шулай ук хәрби пенсионерларга ярдәм итүгә аерым игътибар бирелгән.

"Хөкүмәт узган ел өчен инфляциянең факттагы дәрәҗәсен исәпкә алып, хәрби пенсионерларга түләүләрне яңадан исәпләде. Инде 5,1% ка башкарылган индексациядән тыш, 4,4 процентка өстәмә индексация кертелә. Хәрби пенсионерлар, гыйнвар һәм февраль өчен өстәмә түләүләрне дә кертеп, индексацияләнгән түләүләр алачак", — дип ассызыклады депутат.

Чаплин ачыклык керткәнчә, түләүләрнең артуы элеккеге хәрби хезмәткәрләргә генә түгел, ә көч ведомстволары хезмәткәрләренә дә кагылачак. Боларга - янгын сүндерүчеләр, полиция хезмәткәрләре, приставлар, Росгвардия һәм ФСИН хезмәткәрләре керә.