Фәнис Җаббаров көрәшче шәкерте Сергей Павлик турындагы хәбәрләр хакында

Хәбәр күпләрне борчуга салды, әлбәттә. Сергей Павликны бөтен көрәш җәмәгатьчелеге белә, берничә ел дәвамында бил бирмәс егетне хөрмәт итәләр. Без, әлеге хәбәргә аңлатма алу өчен, Сергейны көрәш келәмендә танытуга зур өлеш керткән Фәнис Җаббаровка мөрәҗәгать иттек.

- Бу сорау белән күпләр мөрәҗәгать итте. Нәрсә дип әйтим? Әлегә хәбәр имеш-мимеш дәрәҗәсендә. Чөнки бернинди расланган мәгълүмат та юк. Туганнары белән сөйләштем, алар да бернәрсә белмиләр. Ә махсус хәрби операциягә китүен ишетеп белдем. Анда җыенганын белгән булсам, җибәрә идеммени мин аны! Әйе, акчага мохтаҗлыгы бар иде. Сабантуйларда көрәшерлек хәлдә түгел иде, күнегүләргә йөрмәде. МХОгә дә, Ульяннан яки Татарстаннан түгел, башка төбәктән киткән, диделәр. Төгәлрәк хәбәр булсам, җиткерермен. Утсыз төтен булмый, диләр инде, анысы. Шулай да яхшыга өметләник.