Һәр категориядә олимпиада җиңүчесе 50 000 сум алачак

Бүген исә олимпиаданың икенче этабы барышында укучылар «Минем булачак һөнәрем һәм Татарстан мәнфәгатьләрендә эшчәнлегем» темасына шәхси проектларын яклады. Моңарчы, беренче турда,  алар онлайн тест үтте. Ә сораулар төрле категориядә, ягъни гуманитар, техник, социаль-гуманитар һәм төгәл фәннәр буенча белем алучы студентларның татар телен һәм әдәбиятын белү дәрәҗәсен тикшерү максатыннан төзелгән.

Саннарга килгәндә, барлыгы 609 кеше теркәлгән, шуларның 221е икенче турга  чыккан. Чараның үзәгендә 81 катнашучы булды. Алар ике төркем: татар телен туган тел буларак һәм татар телен дәүләт теле буларак өйрәнүчеләргә бүленделәр.

Студентлар «Сөйләүченең осталыгы өчен», «Экспрессив тел чараларын оста кулланган өчен», «Темага фәлсәфи яктан якын килү өчен»  һәм башка номинацияләр арасында көч сынашты. 

Олимпиада Татарстан Рәисе каршындагы татар телен һәм республикада яшәүче халыклар вәкилләренең туган телләрен саклау, үстерү мәсьәләләре комиссиясе һәм Татарстан Мәгариф һәм фән министрлыгы ярдәмендә үткәрелә.

14 нче ноябрьдә җиңүчеләрне бүләкләү тантанасы көтелә. Һәр категориядә олимпиада җиңүчесе 50 000 сум, икенче урын 40 000 сум һәм өченче урын алучылар 30 000 сум күләмендә акчалата призга ия булачак. 

Гомумән алганда, комиссия әгъзаларына Татарстан ышанычлы кулларда икәне билгеле булды. Проект ясаучылар үзләрен киләчәктә укытучы, сыйфат белән идарә итү белгече, оештыручы итеп күрәләр. Барлык катнашучылар республиканың үсешенә һәм камилләшүенә өлешләрен кертергә вәгъдә иттеләр.

Алинә Фәхретдинова