Кариев театры тамашачыларны яңача каршы ала

Аның максаты – бинаның бай тарихын саклап калу гына түгел, ә аны киң аудитория өчен тагын да заманчарак итү. 

Яңа стиль эшләү белән дизайнер Эльвина Ризванова шөгыльләнгән, ул Кариев театрын үзгәртү буенча үзенең карашын тәкъдим иткән. "Безнең максат – театрны аның мирасын югалтмыйча, визуаль яктан таныла торган һәм заманча итү. Без традицияләрне һәм тарихны саклап кына калмыйбыз, ә заман белән бергә атлап, яңаны барлыкка китереп, тамашачы белән аңлаешлы телдә сөйләшеп, яңасын да тудырабыз."– дип уртаклашты дизайнер. 

Кариев театры логотибын да үзгәрткән. Ул иске театр афишаларыннан илһамланган геометрик һәм кырыс формадан гыйбарәт. Шул ук вакытта логотипның шома һәм җиңел сызыклары традицион татар орнаментын хәтерләтә, ә гомуми силуэт театр билетына ошаган. Редизайн кысаларында шулай ук индивидуальлек өстәүче гадәти булмаган шрифт билгесе дә эшләнгән. Театр шәмәхә төсне актив куллана. Бу төс – яңалыкны, креативлыкны символлаштыра. Театрны тамашачыларга тагын да якынрак һәм аңлаешлырак итү өчен махсус стикерлар, шопперлар, блокнотлар эшләнелә. Шулай ук үзгәрешләр афишаларга, социаль челтәрләргә һәм хәтта автобуска да кагылган. 

Кариев театрының яңа стиле – киләчәккә таба кыю адым. Ул яңа тамашачыларны җәлеп итәр дип ышанып калабыз. 

Азалия Вәлиуллина