Казан федераль университетында “Кеше һәм цифрлы киңлек” халыкара медиафорумы башланды

Форумга Россиянең төрле төбәкләреннән һәм чит илләрдән медиасфераны өйрәнүче галимнәр, югары уку йортлары укытучылары, журналистика факультетлары студентлары, шулай ук гаммәви мәгълүмат чараларында эшләүче практик белгечләр җыелды. Ике көн дәвамында алар заманча медиамохитнең үзгәрүе, цифрлы технологияләр чорында журналистиканың үзгәреше, ясалма интеллектның җәмгыятькә һәм медиакоммуникацияләргә йогынтысы турында фикер алышачак.

«Татмедиа» республика матбугат һәм массакүләм коммуникацияләр агентлыгы житәкчесе Айдар Сәлимгараев журналистиканың бүгенге чордагы үзгәрешләре турында сөйләде һәм медиа тармагы алдында торган сорауларга тукталды: 
— Безнең алда зур билгесезлек тә бар. Яңа технологияләр шартларында журналистиканың урыны нинди булачак, алга таба ничек эшләячәкбез – болар барысы да борчый. Яшьләр өчен бу гадәти әйбердер инде. Ә бездә ул курку уята: киләчәктә безне нинди юллар көтә, нәрсә белән шөгыльләнербез? Шуңа күрә сезнең эзләнүләр белән кызыксынып танышачакмын, - дип катнашучыларга уңышлар теләде.
Журналистиканың төп кыйммәтләре турында фикерне журналист, «Яңа Гасыр» телерадиокомпаниясе генераль директоры, Татарстан Республикасы Дәүләт Советы депутаты Илшат Әминов та дәвам итте. Ул медианың нигезендә технологияләр түгел, ә кеше торырга тиешлеген ассызыклады.
— Журналистика эшчәнлегенең үзәгендә һәрвакыт кеше тора. Безнең хезмәтнең асылы – кешене яратуда. Кешеләрне яратмыйча журналистикада эшләп булмый. Аларга ярдәм итәргә омтылырга кирәк. Хәтта җәмгыятьтәге кимчелекләрне тәнкыйтьләгәндә дә без моны кешеләрнең тормышы яхшырак булсын өчен эшлибез, — диде ул. 
Форум программасында фәнни секцияләр, панель дискуссияләр һәм мастер-класслар каралган. Катнашучылар медиа киңлегендәге яңа тенденцияләр, аудитория белән эшләүнең заманча алымнары, шулай ук журналист һөнәренең цифрлы чорда нинди юнәлештә үсәчәге турында фикер алыша.

Флорид Әгъзамов —журналист, тарих фәннәре кандидаты, тәрҗемәче. 
Галим гомере буе журналистиканың гуманистик кыйммәтләрен яклап эшли, практик тәҗрибәне фәнни нигез белән бәйли. Флорид Әгьзамовның "Үзәктә - кеше", " Тукай - журналист" дип аталган китаплары бүген дә үзенең әһәмиятен югалтмый. Аның исеме журналистлар һәм галимнәр тарафыннан зур хөрмәт белән искә алына. Флорид Әгъзамов истәлегенә Журналистика һәм медиакоммуникацияләр югары мәктәбендә аның исемендәге аудитория эшли. 

КФУ мәйданчыгында узучы медиафорум нәкъ менә шул традицияләрне дәвам итеп, журналистиканың киләчәге турында ачык сөйләшү мәйданына әйләнде.

Залинә Гыйләҗиева