Казанда «Тау фест» китап фестивале узачак

Фестивальдә төрле төбәкләрдән язучылар, рәссамнар һәм артистлар катнашыр дип көтелә. Кунаклар өчен очрашулар, мастер-класслар, квизлар, музыкаль һәм белем бирү программалары әзерләнгән.

«Бәхетле тарихлар» мәдәниятне үстерү хәйрия фонды директоры Елена Исламова аңлатканча, фестивальнең исеме татар телендәге «тау» сүзеннән алынган. Аның сүзләренчә, китап уку һәм белем алу кешегә яңа биеклекләргә омтылырга ярдәм итә.

Фестивальдә танылган язучылар Дмитрий Емец, Дарья Донцова, Андрей Усачев, Сергей Махотин, Нина Дашевская һәм башка авторлар катнашуы көтелә. Дмитрий Емец чарада үзенең әсәрләрен тәкъдим итәчәк.

Роберт Миңнуллин исемендәге Республика балалар китапханәсе дә фестивальдә ике мәйданчык белән эшләячәк. Беренчесендә Татарстан язучылары белән очрашулар узса, икенчесе балалар һәм ата-аналар өчен оештырылачак. Анда әдәби мастер-класслар, квизлар һәм китапларга багышланган башка чаралар үткәреләчәк.

Фестивальдә татар язучылары Ленар Шәехов, Лилия Гыйбадуллина, Галия Гайнетдинова, Рифат Сәлахов, Газинур Морат һәм башка авторлар да катнашачак.

«Тау фест» китап сөючеләр өчен яңа әсәрләр белән танышу, язучылар белән аралашу һәм балаларны китап укуга җәлеп итү мөмкинлеге бирәчәк.