KazanForum кысаларында беренче тапкыр Бөтенроссия авыл Сабан туе стенды күрсәтелде

XVI Халыкара икътисади форум «Россия — Ислам дөньясы: KazanForum» кысаларында беренче тапкыр Бөтенроссия авыл Сабан туе стенды күрсәтелде, дип хәбәр итә Бөтендөнья татар конгрессы матбугат хезмәте.

Күргәзмәдә Киров өлкәсе Нократ Аланында узачак XV юбилей Бөтенроссия авыл Сабан туенның стендын тәкъдим итте. 2025 елның 27–29 июнендә узачак бәйрәм Россиянең төрле төбәкләреннән катнашучыларны берләштерәчәк һәм милләтләр арасындагы дуслыкны ныгыту, татар мәдәниятен таныту өчен әһәмиятле мәйданчык булачак.

Әлеге проект Бөтендөнья татар конгрессы һәм Киров өлкәсе арасындагы уртак хезмәттәшлек нәтиҗәсе булып тора.

«Казан Экспо» мәйданчыгында «Россия – Ислам дөньясы: KazanForum» XVI халыкара икътисадый форумын һәм «Russia Halal Expo 2025» күргәзмәсен ачу тантанасы узды. Ачылу тантанасында Россия Федерациясе Хөкүмәте Рәисе урынбасары Марат Хөснуллин, Татарстан Рәисе Рөстәм Миңнеханов, ИХО Генераль секретаре урынбасары Әхмәд Кавеса Сенгендо катнашты.