Казанлылар өчен бушлай тикшерү: 2026 елда 820 мең кеше диспансерлаштыру узачак

Бу профилактик медицина тикшерүләре «Озак һәм актив тормыш» милли проекты кысаларында үткәрелә.

Шәһәр сәламәтлек саклау учреждениеләре планында берничә юнәлеш каралган:

* 512 164 өлкән кеше – диспансерлаштыру узачак;
* 82 495 кеше – профилактик тикшерү үтәчәк;
* 2 288 кеше – тирәнтен медицина тикшерүенә җибәреләчәк;
* 224 261 кеше (18–49 яшь) – репродуктив сәламәтлекне тикшерә алачак.

Диспансеризацияне яшәү урыны буенча беркетелгән поликлиникада бушлай узарга мөмкин.

Табиблар искәрткәнчә, мондый даими профилактик тикшерүләр хроник авыруларны иртә стадиядә ачыкларга ярдәм итә һәм җитди чирләрне вакытында дәвалау мөмкинлеге бирә.

Белгечләр казанлыларны сәламәтлекләренә игътибарлы булырга һәм ел саен медицина тикшерүе узарга чакыра.

Билгеле булганча, Татарстанда «Сәламәтлек технологиясе» илкүләм проекты гамәлгә ашырыла.