Көрәш дөньясында 2024 елның иң-иңнәре: көрәшчеләр, тренерлар, журналистлар...

Динар Кәримуллин, Азат Габдрәшитов, Булат Мусин, Радик Сәлахов, Ранис Гыйләҗетдинов. 2024 елгы көрәш сезонының иң яхшы спортчылары дип шушы танылган батырларыбыз билгеләнгән. «Ел саен без өч кенә иң яхшы көрәшчене ачыклый идек. Быел исә барлык нәтиҗәләрне барлагач, биш көрәшченең күрсәткечләре бер төрле булды. Соңгы елларда мондый хәлнең булганы юк иде әле», дип белдерде безгә Марсель Таһиров.

Татарстан көрәш федерациясе елның иң яхшы тренерын ачыклаганда, аларны ике төркемдә бүлә: өлкәннәр белән эшләүче остазлар һәм яшьләр белән иң югары нәтиҗәләргә ирешкән тренерлар. Өлкәннәр белән шөгыльләнүче 2024 елның иң яхшы тренерлары дип Илнур Хәйбуллин (Чаллы), Динар Кәримуллин (Лаеш) һәм Ильяс Билалов (Әлмәт) танылган. Яшьләр белән эшләүче иң яхшы остазлар дип Илгиз Шәмсевәлиев (Чаллы), Рузил Ганиев (Әлмәт) һәм Ринат Хәйретдинов (Балтач) аталган.

2024 елда көрәш темасын яктырткан иң яхшы журналистлар да билгеләнгән. Алар:
Нурзада Сәмигуллин (Балтач)
Фәнил Нигъмәтҗанов (Теләче)
Рамилә Хәмидуллина (Әлмәт)

Лилия Йосыпова ("Ирек мәйданы")
Атлас Гафиятов ("Татарстан яшьләре")
Илнар Хөснуллин ("Ватаным Татарстан")