Күп балалы гаиләләр өчен яңа ташлама кертергә мөмкиннәр

Россиядә күп балалы гаиләләр өчен ягулык карталары барлыкка килергә мөмкин, Хөкүмәт тиешле идея өстендә эшли. Бу хакта «Известия» газетасы Энергетика министрлыгы башлыгының беренче урынбасары Павел Сорокинның Хөкүмәт Аппаратына язган хатына сылтама белән хәбәр итте.

Материалда билгеләп үтелгәнчә, бу мәсьәләне эшләү йөкләмәсен октябрьдә РФ Президенты каршындагы Бала хокуклары буенча вәкаләтле вәкиле Мария Львова-Белова мөрәҗәгатеннән соң вице-премьер Александр Новак биргән.

Энергетика министрлыгында белдерүләренчә, үз структурасында АЗС челтәре булган нефть-газ компанияләре инициативаның мөһимлеге белән килешә, шул ук вакытта кайбер компанияләр халыкның аерым төркемнәре өчен ягулык карталарын бирүнең катлаулылыгы турында сөйлиләр. Алар шулай ук аларны намуссыз файдалану куркынычы аркасында борчылуларын белдерә.

Сорокин хатында ягулык карталарын керткәндә компанияләргә күп балалы гаиләләр белән эшне оештыру өчен өстәмә кадрлар ялларга туры киләчәк диелә. Моннан тыш, бюджетларны яңадан карау таләп ителәчәк. Шул ук вакытта чыгымнарны каплау чыганагы аңлашылмый.

Нефть компанияләре Энергетика министрлыгы соравына җавапларында ведомстводан бурычны конкретлаштыруны, кайбер сорауларга җавап бирүне һәм ташламалар белән идарә итү нечкәлекләрен исәпкә алуны сорадылар.