Мәктәпләрдә башлангыч хәрби әзерлек мәҗбүри булачак: укучыларны нәрсәгә өйрәтәчәкләр?

Россия Мәгариф министрлыгы әзерләгән боерык проекты нигезендә, предмет ике мәҗбүри уку курсына бүленә: «Тормыш иминлеге» һәм «Башлангыч хәрби әзерлек». Һәр курс 34 сәгатькә исәпләнгән.

Россия мәгариф министры Сергей Кравцов сүзләренчә, яңартылган программа гамәли күнекмәләргә басым ясый. Максат – мәктәп укучыларын төрле тормыш хәлләрендә дөрес гамәл кылырга өйрәтү, шәхси иминлек күнекмәләрен үстерү һәм дәүләт куркынычсызлыгы мәсьәләләренә җаваплы караш тәрбияләү.

Нәрсәгә өйрәтәчәкләр?

«Тормыш иминлеге» курсы кысаларында укучылар:

• көнкүреш приборларын куркынычсыз куллану;

• янгын һәм коммуналь аварияләр вакытында дөрес эш итү;

• ашыгыч хезмәтләрне чакыру тәртибе;

• юл хәрәкәте иминлеге;

• табигый хәвеф-хәтәрләр вакытында үз-үзеңне тоту;

• массакүләм чараларда куркынычсызлык кагыйдәләре;

• цифрлы мохиттә хәвефсезлек нигезләрен өйрәнәчәк.

«Башлангыч хәрби әзерлек» курсында исә:

• Россия Конституциясендә каралган милли куркынычсызлык принциплары;

• гражданнар оборонасы системасы;

• шәхси һәм коллектив саклану чараларын куллану;

• эвакуация вакытында эш итү тәртибе;

• хәрби хезмәткә әзерлек нигезләре;

• гомумхәрби уставлар;

• строй әзерлеге һәм хәрби дисциплина;

• экстремизм һәм терроризмга каршы тору;

• беренче медицина ярдәме күрсәтү буенча практик дәресләр каралган.

Яңа программа 2026 елның 1 сентябреннән иң элек 8 һәм 10 сыйныф укучылары өчен гамәлгә керәчәк.

Исегезгә төшерәбез, «Иминлек һәм Ватанны саклау нигезләре» предметы мәктәпләрдә 2024 елның сентябреннән укытыла башлады һәм элекке ОБЖ («Тормыш иминлеге нигезләре») фәнен алыштырды. Моңа кадәр хәрби әзерлек элементлары ОБЗР программасының бер модуле буларак кына укытылса, хәзер ул аерым мәҗбүри курс дәрәҗәсенә күтәрелә.