Миңнеханов: «Яшьләр дипломатиясен үстерү - республикабызның яшьләр сәясәтенең өстенлекләреннән берсе»

Татарстан Рәисе ассызыклаганча, KazanForum кырларында Яшь дипломатлар форумын уздыру күркәм традициягә әверелде. Шул чорда анда 40 илдән 300дән артык вәкил катнашты. Моннан тыш, Казан 2022 һәм 2023 елларда Яшь дипломатларның глобаль форумнары башкаласы булды. Узган ел Казан БРИКС саммитын кабул итте. «Сез һәм сезнең күп кенә коллегаларыгыз чараны югары дәрәҗәдә уздыруда ярдәм иттегез", - дип мөрәҗәгать итте Рөстәм Миңнеханов очрашуда катнашучыларга.

Ул билгеләп үткәнчә, яшьләр дипломатиясен үстерү, халыкара яшьләр хезмәттәшлеген ныгыту - Татарстан яшьләр сәясәтенең өстенлекле юнәлешләреннән берсе. Республикада ислам илләре яшьләре белән әңгәмә коруның, шулай ук Яшьләр дипломатиясе академиясе проектлары мисалында БРИКС һәм ШОС илләре белән хезмәттәшлек итүнең күпьеллык уңай тәҗрибәсе бар. «Алар төрле илләрдән яшь лидерларны Татарстанга укыту һәм карьераларын башлау өчен дә, уртак халыкара проектларны киңәйтү өчен дә җәлеп итәләр", - дип билгеләп үтте Татарстан Рәисе.

«Беренчеләр хәрәкәте» базасында Россиянең 60 төбәген һәм 24 илне берләштергән дипломатия мәктәп клублары проекты үсеш ала. Гадәттәгечә августта Казан глобаль яшьләр саммиты уза. Быел аның көн тәртибендә «Глобаль үзгәрешләр чорында шәхеснең белем алуы, кыйммәтләр һәм карьера траекторияләре» темасы. Яңа өлкәләр дипломатиясенең роле, шул исәптән мәдәни һәм гуманитар аспект, шулай ук глобальләшү чорында мәдәни кодны саклауга аерым игътибар биреләчәк. Рөстәм Миңнеханов ИХО илләренең яшь дипломатларын бу чарада катнашырга чакырды.

КФУда узган ел үзенең 30 еллыгын Халыкара мөнәсәбәтләр бүлеге билгеләп үтте. Бүген Россия Тышкы эшләр министрлыгы системасында аны тәмамлаган 40ка якын кеше эшли.

ИХО илләренең Яшь дипломатлары форумының быелгы темасы - «Җиңү дипломатиясе». "Бу тема безнең һәрберебез өчен бик актуаль һәм мөһим, бигрәк тә Бөек Ватан сугышында Җиңүнең 80 еллыгын бәйрәм итү елында. Дипломатлар фашизмга каршы көрәштә дөнья дәүләтләрен берләштерүдә һәм җиңүне якынайтуда мөһим роль уйнадылар. Бөек Җиңү турындагы истәлек - тарих кына түгел, киләчәк буыннар өчен дә сабак", - дип ассызыклады Рөстәм Миңнеханов һәм форумда катнашучыларга нәтиҗәле эш һәм кызыклы дискуссияләр теләде.

Очрашуда катнашучыларга сәламләү сүзләре белән Россия Тышкы эшләр министрлыгының Күп яклы гуманитар хезмәттәшлек һәм мәдәни элемтәләр департаменты бүлеге башлыгы Константин Колпаков һәм Россия Тышкы эшләр министрлыгының Яшь дипломатлар советы рәисе Екатерина Акопян мөрәҗәгать итте. Алар республика җитәкчелегенә Яшь дипломатлар советы инициативаларын хуплаулары өчен рәхмәт белдерделәр һәм Татарстан белән хезмәттәшлекнең алга таба үсешенә өмет белдерделәр.

Үз теләкләрен БГӘ, Гыйрак, Сьерра-Леоне, Кыргызстан, Иран, Төрекмәнстан, Индонезия, Гвинея Республикасы, Марокко, Төркия, Камерун, Бәхрәйн, Оман яшь дипломатлары җиткерде.

Ислам хезмәттәшлеге оешмасы илләренең IX Яшь дипломатлары форумы 13-17 май көннәрендә уза. Форумның максаты - катнашучы илләр арасында (шул исәптән төбәк дәрәҗәсендә) элемтәләрне үстерү, шулай ук ИХО илләреннән яшь коллегалар белән ышанычлы мөнәсәбәтләр урнаштыру. Быел форумда 19 илдән 50ләп делегат катнаша: тышкы сәясәт ведомстволарының яшь хезмәткәрләре, хакимият вәкилләре һәм иҗтимагый оешмалар вәкилләре, халыкара экспертлар.

ТР Рәисе Матбугат хезмәте