Онищенко 1 сентябрьне ял көне итү тәкъдимен тәнкыйтьләде

Бу хакта ул ТАСС агентлыгына биргән әңгәмәсендә белдерде.

Онищенко фикеренчә, бөтен ил өчен өстәмә ял көне кертүнең мәгънәсе юк, чөнки Белем көнендә мәктәпкә нигездә беренче сыйныф укучылары гына ата-аналары белән килә. Аның сүзләренчә, ел саен беренче сыйныфка якынча 1 миллион бала укырга керә, ә күпчелек очракта аларны мәктәпкә әниләре яки инде эшләмәгән әби-бабайлары озата.

Академик шулай ук өлкән сыйныф укучыларының гадәттә мәктәпкә мөстәкыйль йөрүен искәртте. Аның әйтүенчә, җиденче-сигезенче сыйныфтан башлап балалар еш кына ата-аналары белән мәктәпкә килергә теләми, ә студентларны исә, кагыйдә буларак, беркем дә укырга озатып йөрми.

Моннан тыш, Онищенко фикеренчә, беренче сыйныф укучысын мәктәпкә озату өчен әниләр кирәк булганда эштән вакытлыча сорап китә ала, ә бу вазифаны гаиләдәге башка өлкәннәр дә башкара ала.

Исегезгә төшерәбез, элегрәк Дәүләт Думасы депутатлары, вице-спикер Владислав Даванков җитәкчелегендә, 1 сентябрь – Белем көнен дәүләт бәйрәме һәм рәсми ял көне итеп игълан итүне күздә тоткан закон проектын Хөкүмәткә бәяләмә алу өчен юллаган иде.