Пенсионерлар җәмәгать транспортында ташламалардан, бушлай яки ташламалы дарулардан, шифаханә-курорт дәвалануыннан файдалана ала.
Бу хакта РИА Новостига РФ Кеше хокуклары буенча вәкаләтле вәкил Яна Лантратова сөйләде.
Транспортта ташламаларны төбәкләр билгели
Россиядә барлык пенсионерлар өчен җәмәгать транспортында бердәм федераль ташлама юк. Аның шартларын төбәкләр мөстәкыйль билгели. Шуңа күрә кайбер җирләрдә пенсионерлар бушлай йөри, икенчеләрендә ташлама каралган, ә кайбер төбәкләрдә ул аерым категорияләргә генә бирелә.
Ерак Төньяк районнарында һәм аларга тиңләштерелгән җирлекләрдә яшәүче эшләмәүче пенсионерлар ике елга бер тапкыр ял итү урынына бару һәм кире кайту чыгымнарына компенсация ала ала.
Социаль хезмәтләр җыелмасын алучыларга, тиешле хокуклары булганда, дәвалану урынына һәм кире кайту өчен бушлай юл йөрү мөмкинлеге бирелә. Аерым маршрутларда субсидияләнгән авиабилетлар программасы да гамәлдә.
Пенсионерларга дарулар һәм социаль хезмәтләр бирелә
Аерым ташламалы категорияләргә бушлай яки ташламалы дарулар, шифаханә-курорт дәвалануы каралган. Теш протезлау мөмкинлеге гражданның категориясенә һәм төбәк кагыйдәләренә бәйле.
Яше, сәламәтлеге, җәрәхәте яки инвалидлыгы аркасында ярдәмгә мохтаҗ кешеләр өйдә социаль хезмәт күрсәтү сорап мөрәҗәгать итә ала. Моның өчен гражданның хәле бәяләнә һәм индивидуаль программа төзелә.
80 яшьтән соң пенсия түләве арта
80 яшькә җиткәч, картлык буенча иминият пенсиясенә билгеләнгән түләү автомат рәвештә ике тапкыр арта. Моның өчен гариза бирергә кирәкми.
Моннан тыш, 80 яшьтән өлкәнрәк кешеләргә һәм I төркем инвалидларга тәрбиягә бәйле өстәмә түләү каралган.
Кызыклы яңалыкларны күзәтеп бару өчен безнең МАХ каналына кушылыгыз.
Комментарийлар