Пенсионерларның финанс хәлен күзәтүгә алачаклар

Россиядә пенсионерларның финанс хәлен даими күзәтеп торырга ниятлиләр. Бу хакта Хөкүмәт тарафыннан расланган планда әйтелә.

Әлеге документ нигезендә пенсионерларның социаль-икътисади хәле турында докладлар ике елга бер — 2026, 2028 һәм 2030 елларда әзерләнәчәк. Моның өчен комплекслы анализ үткәрү күздә тотыла, аның нәтиҗәләре буенча пенсионерларның финанс хәлен яхшыртуга юнәлдерелгән тәкъдимнәр әзерләнергә тиеш.

Эшләрне башкаручы итеп Югары икътисад мәктәбе билгеләнгән. Университет мониторинг нәтиҗәләрен хезмәт министрлыгына җибәрәчәк.