Рамазан нәтиҗәләре: Татарстанда 3000нән артык мохтаҗга ярдәм күрсәтелде

Мохтаҗларга ярдәм итүгә юнәлдерелгән әлеге акция Татарстан Диния нәзарәте тарафыннан изге айның беренче көнендә игълан ителгән иде.

Быел марафон кысаларында Татарстан Диния нәзарәтенең “Зәкят” хәйрия фонды тарафыннан җитди диагнозлы 48 балага дәвалану һәм тернәкләнү өчен ярдәм күрсәтелде. Моннан тыш, 55 өлкән кеше дә финанс ярдәм алды.

Хәйрия чаралары кысаларында дини уку йортлары да игътибардан читтә калмады. “Мөхәммәдия” мәдрәсәсенә 1 миллион сум күләмендә ярдәм бирелде, ә тагын җиде мәчет һәм мәдрәсәгә гомуми 764 мең сум тапшырылды. Гомумән алганда, акчалата ярдәм күләме 9 миллион 922 мең сум тәшкил итте. Әлеге чаралар фитыр һәм фидия сәдакалары, шулай ук адреслы җыелган ярдәм хисабына тормышка ашырылды.

Быел да “Зәкят” фонды сәдакаларны электрон рәвештә җыюны оештырды. Нәтиҗәдә, фитыр сәдакасы 2 189 221,39 сум, ә фидия 1 252 007,09 сум күләмендә җыелды.

Марафонның мөһим юнәлешләренең берсе — мохтаҗ гаиләләрне азык-төлек белән тәэмин итү булды. Ай дәвамында 500дән артык аз керемле гаиләгә 5 тонна күләмендә азык-төлек таратылды. Һәр җыелманың авырлыгы 10 килограмм тәшкил итте.

Шулай ук фонд тарафыннан 50 ифтар мәҗлесе оештырылды, анда 2500 кеше авыз ачты.

Рамазан ае кысаларында башка хәйрия акцияләре дә уздырылды. Мәсәлән, “Егет” барбершопында күпбалалы, аз керемле гаиләләрдән булган һәм сәламәтлеге чикле 10 балага бушлай чәч кисү хезмәте күрсәтелде. Шулай ук Казанда бишенче ел рәттән хәйрия автобусы йөрде. Совет, Идел буе, Вахитов һәм Киров районнарын тоташтырган маршрут буенча быел 1200 кеше бушлай йөрү мөмкинлегеннән файдаланды.

Гомум нәтиҗә буенча, 2026 елда “Рамазан – изге гамәлләр ае” хәйрия марафоны кысаларында 3113 мохтаҗ кешегә ярдәм күрсәтелде.

Татарстан Диния нәзарәте әлеге акциядә катнашкан барлык игелекле кешеләргә һәм партнерларга рәхмәт белдерә. Изге айда кылынган барлык гамәлләр кабул булсын.