Равил Закировның язылучылары блогерны ялганда гаепли

Танылган блогер телеграм-каналында тормышындагы соңгы вакыйгалары белән бүлеште. Күп кеше бу тарихларның чын булуына ышанмауларын яза.

Искәртеп узарга кирәк, Равил Закиров бу җәйдә өйләнергә җыенуын белдергән иде. Берничә айдан соң ул йөргән кызы – блогер Миләүшә Хәкимова белән аерылышуын хәбәр итте. Биш ай сөйләшми-аралашмый яшәүдән соң, тормыш әлеге ике кешене янә очраштыра. Равилнең машина йөртү таныклыгын алулары, машинаны штрафстоянкага җибәрергә теләүләре, полиция хезмәткәрләре тоткарлаулары, суд һәм Миләүшәнең ярдәмгә килүе ике блогерның социаль челтәре аша яктыртылды.   

Күпләр яшьләрнең уртак видеоларын күреп янә бергә булуларына өметләнә. Әмма Равил телеграм-каналында үзенең җыр сүзләре белән җавап кайтара һәм азактан Миләүшә белән бергә түгел икәнлегенә ишарә ясый: “Чуалган язмышның ялгышын, Аңларга түземлек җитмәде... Без – ул без түгел. Без – аерым. Без “БЕЗ” сүзен төзи белмибез”.

Сүз уңаеннан, Равил “Чуалган язмыш” җырын нәкъ менә Миләүшә белән аерылшкач язган иде, ягъни әлеге иҗат җимеше аларның катлаулы мәхәббәт тарихын ачып бирә…