Рекордлы күрсәткеч: 10 нчы сыйныфны көллияткә алыштыручылар саны арта

Мәгариф министрлыгы мәгълүматлары буенча, «Коммерсанть» басмасына бирелгән мәгълүматларга караганда, 2025 елда тугызынчы сыйныф укучыларының 63 проценты 10 нчы сыйныфка күчү урынына көллият һәм техникумнарны сайлаган. Конкурс бик зур булып чыккан: 4 миллионга якын гариза бирелгән, шулардан 1,3 миллион абитуриент кабул ителгән.

Урта һөнәри белем бирү системасында студентларның гомуми саны 3,9 миллион кешегә җиткән. Ведомствода билгеләп үтүләренчә, эшче һәм гамәли белгечлекләрнең популярлыгы ярты гасыр элек булган күрсәткечләргә әйләнеп кайткан.
«Бу рекордлы саннарга без илле елга беренче тапкыр чыктык. 1970 елларда гына да техникумнарда һәм училищеларда 4 млн бала белем алган», - дип ассызыклыйлар министрлыкта.

Быел 850 меңнән артык бюджет урыны бүлеп бирелгән, бу былтыргы күрсәткечтән 68 меңгә күбрәк. Шуңа да карамастан, студентларның 37 проценты түләүле рәвештә укырга мәҗбүр. Иң популяр юнәлешләр «ак якалар» (IT-системалар, шәфкать туташы һәм дәвалау эше, педагогика, туризм), шулай ук эшче куллар — эретеп ябыштыручылар, пешекчеләр, автомеханиклар һәм төзүчеләр булган. Студентлар саны буенча Мәскәү, Петербург, Кубань, Свердловск һәм Чиләбе өлкәләре лидер булып кала бирә.

Колледжларга кызыксыну үсеше йомгаклау аттестациясе белән экспериментлар фонында бара. 2025 елда Мәскәүдә, Санкт-Петербургта һәм Липецк өлкәсендә урта һөнәри белем бирү оешмасына керүчеләргә дүрт урынына нибары ике ОГЭ (рус теле һәм математика) тапшырырга рөхсәт итә торган пилот проекты эшләтеп җибәрелгән. Хәзер Дәүләт Думасында бу практиканы илнең башка төбәкләренә дә киңәйтәчәк закон проекты икенче укылышка әзерләнә.