Республикада барлык сайлау участоклары эше туктатылды

Сайлаулар хокук бозуларсыз узды. Татарстан үзәк сайлау комиссиясе сайлау нәтиҗәләрен исәпләү белән мәшгуль. Шулай ук бүген Exit-pool социаль тикшеренүе үткәрелде. Анда 17 мең кеше катнашкан. Сайлаучылар сайлаудан чыккач, кем өчен тавыш бирүләре белән уртаклашканнар. Социаль фәлсәфи фәннәр һәм массакүләм коммуникацияләр институты директоры Мария Ефлова сүзләренчә, бу тикшеренү төгәл мәгълүмат бирми, әмма сайлау нәтиҗәләрен фаразларга ярдәм итә. Exit-pool буенча Рөстәм Миңнеханов өчен - 89.1 процент, Хафиз Миргалимов өчен - 4,5 процент, Виталий Смирнов өчен - 1,5 процент, Руслан Юсупов өчен - 3,9 процент кеше тавыш биргән. Мария Ефлова, алдан ук Рөстәм Миңнехановны җиңүе белән котлады. 

Искәртеп үтәбез сайлаулар 2 мең 752 сайлау участогында узды. Сайлауларны оештыруда һәм уздыруда 22 меңгә якын сайлау комиссиясе әгъзасы җәлеп ителде. 

Татарстан рәисе исеме һәм сайлау буенча төгәл мәгълүмат иртәгә билгеле булачак.