Россия мәктәпләрендә Белем көнен ничек уздырачаклар?

Тантаналы линейкадан соң укучылар өчен «Разговоры о важном» циклы кысаларында беренче дәрес узачак. Бу хакта Россия мәгърифәт министры Сергей Кравцов хәбәр итте.

«Төбәкләргә Белем көнен ничек уздыру буенча киңәшләр җибәрелде. Һәр мәктәптә көн традицион рәвештә башланачак: укучылар Дәүләт флагын күтәрәчәк, гимн башкарачак. Укытучыларның котлауларыннан һәм теләкләреннән соң барлык сыйныфларда да «Разговоры о важном» циклы кысаларында беренче дәрес узачак», – ди министр.

Төп игътибар - Халыклар бердәмлегенә

Кравцов сүзләренчә, Россия халыклары бердәмлеге елы кысаларында беренче дәреснең төп темалары Россия халыкларының бердәмлеге, тарихи хәтерне саклау, патриотик тәрбия һәм традицион рухи-әхлакый кыйммәтләрне ныгыту белән бәйле булачак. Министр мәктәпләр һәм көллиятләрдә Белем көне ил тарихына, аның күпмилләтле мәдәниятенә хөрмәт символына әверелергә тиеш булуын билгеләп үтте.

Мәгърифәт министрлыгы бәйрәм чараларында төрле милләт вәкилләренә, күп балалы һәм берничә буын вәкилләре бергә яшәгән гаиләләргә, хәрби хәрәкәтләр ветераннарына, махсус хәрби операциядә катнашучыларга, уңышка ирешкән укучыларга, шулай ук җәмәгать оешмалары һәм милли-мәдәни берләшмәләр вәкилләре катнашуга аерым игътибар юнәлтергә киңәш итә.

Куркынычсызлык беренче урында

Шул ук вакытта Белем көненә әзерлекнең төп шарты – куркынычсызлык. Сергей Кравцов һәр белем бирү оешмасы бәйрәм вакытында куркынычсызлык чараларының тулы комплексын җентекләп карарга тиешлеген ассызыклады.