Россиядә мошенниклар турында банклар һәм МАКС мессенджеры аша хәбәр итәргә мөмкин булачак

Бу хакта Дәүләт Думасының мәгълүмат сәясәте комитеты рәисе Сергей Боярский белдергән. Аның сүзләренчә, кибермошенниклыкка каршы көрәш буенча закон проектының икенче укылышына тиешле төзәтмәләр кертелгән.

Элегрәк инициатива «кызыл төймә» функциясен бары тик «Госуслуги» платформасында гына урнаштыруны күздә тоткан булган. Хәзер исә әлеге механизмны киңәйтергә тәкъдим ителә.

— Кулланучылар мошенникларның шикле гамәлләре турында мөмкин кадәр тиз һәм уңайлы итеп хәбәр итә алырга тиеш. Шуңа күрә без әлеге функцияне төрле цифрлы сервисларда кабатлауны мөһим дип саныйбыз, — дигән Сергей Боярский.

Төзәтмәләр кабул ителгән очракта, россиялеләр мошенниклык очраклары турында банк кушымталары һәм МАКС мессенджеры аша да хәбәр калдыра алачак.

Белгечләр фикеренчә, бу чара кибермошенниклыкка каршы көрәшне көчәйтергә һәм кешеләрне финанс югалтуларыннан сакларга ярдәм итәчәк.