#Кыскача яңалыклар 12 май 2025, 16:08

Татар дин әһелләре форумында 74 төбәктән 1049 делегат катнашачак

12 май 2025, 16:08

16-18 май көннәрендә Казанда һәм Болгарда «Милли тормыш һәм дин» татар дин әһелләре XV Бөтенроссия форумы узачак, дип хәбәр итә Бөтендөнья татар конгрессының Башкарма комитеты.

Скопировать ссылку

Форум, гадәттәгечә, Россиянең барлык почмакларыннан имамнарны, ислам галимнәрен, дин әһелләрен, җәмәгать эшлеклеләрен һәм экспертларны берләштерәчәк.

Чарада Россиянең 74 төбәгеннән 1049 делегат катнашуы көтелә. Бу Россиядә мөселман руханиларының бердәмлекне ныгытуга, тәҗрибә уртаклашуга һәм күпмилләтле илдә ислам тормышының актуаль мәсьәләләрен хәл итүгә юнәлдерелгән. Форумның тантаналы ачылышы «Казан» агросәнәгать паркында уза. Ачылыштан соң, биредә үк, «Russia Halal Expo 2025» хәләл-индустриясе һәм «Татар базары» күргәзмәсен карау планлаштырыла.

«Kazan Expo» халыкара күргәзмә үзәгендә Татарстан Рәисе Рөстәм Миңнеханов катнашында форумның пленар утырышы узачак. Пленар өлештән соң тематик дискуссон мәйданчыклар эшли башлый. Мәйданчыкларда рухи-әхлакый кыйммәтләрне саклау, ислам мәгарифен үстерү һәм милли үзенчәлекне ныгытуда диннең роле турында фикер алышачаклар.

Форумның йомгаклау көнендә делегатлар борынгы Болгар шәһәренә юл тота. Алар анда «Изге Болгар җыены» чарасында катнашачак.

Хәбәр иткәнебезчә, Татарстан Рәисе Рөстәм Миңнеханов республикада якын араларда узачак зур форумнарга әзерлек һәм аларны уздыруның мөмкин кадәр югары дәрәҗәсен тәэмин итәргә кушты.

Кызыклы яңалыкларны күзәтеп бару өчен безнең МАХ каналына кушылыгыз.

#Миңнеханов