Татарстан муралы «ФормART» бәйгесендә җиңү өчен көрәшә

Халыклар бердәмлеге идеясен чагылдырган рәсем инде Чаллыдагы йортларның берсендә урын тапкан. «ФормART» проекты 2020 елдан бирле тормышка ашырыла. Аның төп максаты — яшьләрнең иҗади потенциалын үстерү, яшь рәссамнарга үз сәләтләрен күрсәтү мөмкинлеге бирү һәм аларның иҗади омтылышларын шәһәр мохитен үстерүгә юнәлтү. Татарстан Республикасы яшьләр эшләре министры урынбасары Владислав Усанов билгеләп үткәнчә, проект яшьләрнең иҗади үзенчәлекләрен ачу белән генә чикләнми, ә актив гражданлык позициясен формалаштыруга да ярдәм итә.   

Проектта Татарстан ел саен диярлек катнаша. Узган елда Татарстанның Яшел Үзән шәһәрендә иҗат ителгән мурал беренче урынны яулаган иде. Бу җиңүгә республика халкының актив тавыш бирүе дә зур өлеш керткән.

Быелгы бәйгенең темасы — Халыклар бердәмлеге — Татарстан өчен аеруча якын. Республикабызда соңгы халык санын алу мәгълүматлары буенча, 175 милләт вәкиле яши. Шуңа күрә төрле халыкларның тынычлыкта һәм татулыкта яшәве турындагы идеяне шәһәр киңлегендә чагылдыру аеруча әһәмиятле.

Күптәнге хыялын тормышка ашыру мөмкинлеге

Быел «ФормART» бәйгесе катнашучылар саны буенча рекорд куйган. Идел буеның 14 төбәгеннән барлыгы 96 гариза килгән. Татарстан гаризалар саны буенча икенче урынны алган, беренче урында — Башкортстан. Татарстан Яшьләр үзәге директоры Анастасия Румянцева сүзләренчә, мурал өчен урын сайлауга оештыручылар аерым игътибар биргән. Башта башка йорт каралган булса да, урынны барып күргәннән соң, аны үзгәртү турында карар кабул ителгән. Нәтиҗәдә, мурал Шамил Усманов урамындагы йортта барлыкка килгән. Рәссам Александр Попов өчен бу проект — иҗади осталыгын күрсәтү генә түгел, ә күптәнге хыялын тормышка ашыру мөмкинлеге дә.

— Урам сәнгате фестивале миңа үз шәһәремдә мурал ясарга дигән хыялымны тормышка ашырырга мөмкинлек бирде, — дип сөйләде рәссам.

Хәзер бәйгедә чираттагы мөһим этап — тавыш бирү бара. Быел аның форматы үзгәргән: элек җиңүчене телефон аша тавыш биреп сайласалар, хәзер тавышны «Дәүләт хезмәтләре» порталы яки «Дәүләт хезмәтләре. Бергә хәл итәбез» кушымтасы аша бирергә мөмкин. Һәр кеше бары тик бер генә тапкыр тавыш бирә ала.   

Татарстанның эше бәйгедә 4нче номер астында тәкъдим ителгән. Татарстан Республикасы яшьләр эшләре министры урынбасары Владислав Усанов республика халкын бәйгедә актив катнашырга чакырды. 

«ФормART» бәйгесенең финалы 21-23 августта узачак. Беренче урын алган рәссам социаль әһәмиятле иҗади проектын тормышка ашыру өчен 200 мең сум, икенче урын өчен — 150 мең, өченче урын өчен 100 мең сум алачак.