Кытай инвесторы Татарстанда протезлар һәм тернәкләндерү өчен кирәкле башка эшләнмәләр җитештерүче заманча предприятие ачарга җыена.
Проектка 1,2 млрд сум инвестиция кертү планлаштырыла.
Guolian/IBI-IIONFAB компаниясе республикада 3D-принтерлар ярдәмендә протезлар һәм башка медицина-тернәкләндерү эшләнмәләре җитештерүне оештырырга ниятли. Бу хакта компания вәкиле Юй Чжоу Татарстан Инвестицион үсеш агентлыгында узган очрашуда хәбәр иткән.
Проект кысаларында Татарстанга Кытай технологияләре һәм заманча җиһазлар китерү күздә тотыла. Сәнәгать 3D-принтерлары ярдәмендә протезлардан тыш, металл детальләр дә җитештерергә мөмкин булачак.
Предприятиене урнаштыру өчен инвесторга якынча 5 мең квадрат метр мәйданлы бина кирәк.
Татарстан Инвестицион үсеш агентлыгы башлыгы Талия Миңнуллина билгеләп үткәнчә, проектның өстенлекләреннән берсе — җитештерүдә кеше хезмәтенең минималь дәрәҗәдә кулланылуы.
«Персонал таләп ителми диярлек. Кешеләрнең минималь катнашуы булачак. Нәкъ менә безнең хезмәт базарындагы вәзгыятьне исәпкә алганда, бу безгә бүген кирәк», — дигән ул.
Проект гамәлгә ашырылган очракта, Татарстанда югары технологияле медицина эшләнмәләре җитештерү юнәлеше үсеш алачак.
Кызыклы яңалыкларны күзәтеп бару өчен безнең МАХ каналына кушылыгыз.
Комментарийлар