Татарстанда 2025 елда 15 меңнән артык яшь кеше эшкә урнашкан

Бу хакта ТР Яшьләр эшләре министрлыгының матбугат хезмәте хәбәр итә.

Яшьләргә ярдәм «Яшьләр һәм балалар» милли проектының «Яшьләр өчен мөмкинлекләр» федераль кампаниясе кысаларында күрсәтелә. Республикада яшь кадрларны эшкә җәлеп итү буенча предприятиеләрдә рекорд күрсәткечләргә ирешелгән.

Татарстанның студент отрядлары эре сәнәгать предприятиеләре белән актив хезмәттәшлек итә. Алар арасында — КАМАЗ, «Алабуга Строй», «Алабуга Композит» һәм «Алабуга Топ».

«Алабуга» махсус икътисадый зонасы мәйданчыкларында студент отрядлары составында бер үк вакытта 1941 студент-төзүче һәм 954 укучы хезмәт куйган.

### Яшьләр грантлар ярдәмендә проектлар тормышка ашыра

ТР Яшьләр эшләре министры Азат Кадыйров Татарстан яшьләренең федераль проектларда һәм грант конкурсларында актив катнашуын билгеләп үтте.

Аерым алганда, «Росмолодежь.Грантлар» конкурсы кысаларында 14 яшьтән 35 яшькә кадәрге яшьләр үз проектларын гамәлгә ашыру өчен 1 миллион сумга кадәр грант ала ала.

Конкурс 18 юнәлешне үз эченә ала — иреклелек, экология, яшьләр медиасы, мәдәни инициативалар һәм башка проектлар.

### Яшьләр форумнары һәм фестивальләр

2026 елның мөһим вакыйгаларының берсе — Идел буе федераль округының «ИВолга» яшьләр форумы. Ул Самара өлкәсендә узачак, анда катнашучылар үз проектларын федераль дәрәҗәдә тәкъдим итә алачак.

Моннан тыш, республикада традицион иҗади проектлар да дәвам итә. Районнарда ел саен меңләгән талантлы балаларны һәм яшүсмерләрне берләштерә торган «Созвездие – Йолдызлык» фестивале башланды. Фестивальнең финал гала-концерты апрель аенда Казанда узачак.

2026 елда Татарстан иреклеләре берничә эре халыкара чарада катнашачак. Аерым алганда, «Россия – Ислам дөньясы: KazanForum» XVII халыкара икътисадый форумы өчен 650 волонтер җыелган.

Шулай ук 2 мең яшь кеше Екатеринбургта узачак Халыкара яшьләр фестивален оештыруга җәлеп ителәчәк.

Моннан тыш, «Тормыш өчен инфраструктура» милли проекты кысаларында төзекләндерү объектлары өчен Бөтенроссия тавыш бирүен уздыруда да волонтерлар катнашачак. Узган ел Татарстанда 600дән артык волонтер халыкка парклар һәм скверлар өчен тавыш бирергә ярдәм иткән.