Татарстанда авыл хуҗалыгы ярминкәләре 12 сентябрьдән башлана

Ярминкәләр һәр шимбәдә Казанның 14, Чаллының 2, Яшел Үзән районының 2, Түбән Каманың 2 мәйданчыгында һәм Кама Аланы шәһәр тибындагы поселогында бер мәйданчыкта узачак. Казанның Беломорский һәм Гудованцев урамнары киселешендәге ярминкәсе якшәмбе көннәрендә эшләячәк.

Сатып алучыларга ит һәм кош ите, йомырка, сөт һәм сөт продуктлары, бәрәңге, яшелчә, шикәр, он, кондитер әйберләре һәм башка азык-төлек тәкъдим ителәчәк.

Продукция ярминкәләрдә ваклап сату бәяләреннән 10–30 процентка арзанрак булачак. Аерым алганда, шикәр комы — 55 сум, бәрәңге, кишер, чөгендер һәм кәбестә — 30 сум, суган — 40 сум, сөт — 50 сум, он — 27,5 сум, кош-корт ите — 200 сум, 10 данә беренче категорияле йомырка — 95 сумнан сатылачак.

Традицион ярминкәләр 2026 елның 27 декабренә кадәр, барлыгы 16 ярминкә атнасы дәвамында уздырылачак.

• Казанда ярминкәләр Аграр, Липатов, Ямашев, Беломорский, Ш. Усманов, Батыршин, Җиңү проспекты, Ю. Фучик, Лаврентьев, Революция, Дементьев һәм А. Авзалова урамнарындагы мәйданчыкларда, шулай ук Кәрим Тинчурин һәм Татарстан урамнары киселешендә оештырылачак.