Татарстанда яшәүчеләргә газ җиһазларын куркынычсыз куллану кагыйдәләрен кабат искәрттеләр

«Газпром трансгаз Казан» белгечләре белдергәнчә, фаҗигале хәлләрне булдырмас өчен биналарны даими рәвештә җилләтеп тору, вентиляция системасының төзек булуын күзәтү, газ җиһазларына вакытында техник хезмәт күрсәтү һәм үз белдегең белән үзгәрешләр кертмәү аеруча мөһим.

Газ хезмәте вәкилләре газ плитәләрен яки башка газ приборларын бүлмәләрне җылыту максатында куллану катгый тыелуын искәртә. Шулай ук эшләп торган җайланмаларны караусыз калдыру, алар янына балаларны якын китерү һәм саклагыч автоматика системаларын сүндерү дә зур куркыныч тудыра.

Газ исе сизелсә, түбәндәге адымнарны кичекмәстән башкарырга кирәк:

• газ приборларын куллануны шунда ук туктатыгыз;

• газ краннарын ябыгыз;

• бүлмәне җилләтү өчен тәрәзәләрне һәм форточкаларны ачыгыз;

• электр җиһазларын кабызмагыз һәм сүндермәгез;

• бинадан кешеләрне чыгарыгыз;

• 104 номеры буенча яки ашыгыч хезмәтләрнең бердәм 112 номеры аша авария хезмәтенә шалтыратыгыз һәм диспетчер күрсәтмәләрен төгәл үтәгез.

Газ белән эш иткәндә һәрвакыт игътибарлы булу – үзегезнең һәм якыннарыгызның гомерен саклау дигән сүз.