Татарстанда юл хәрәкәтенә багышланган мөһим социаль кампания башланды

Татарстанда «Твоя мера — 0 промилле» масштаблы социаль кампаниясе старт алды. Татарстан буенча Дәүләт автоинспекциясе, төбәк хөкүмәте һәм профильле ведомстволар консультациясе ярдәмендә гамәлгә ашырыла торган инициатива исерек машина йөртүчеләре катнашындагы юл-транспорт һәлакәтләре санын киметүгә юнәлдерелгән. Чара «Напитки Вместе» компаниясе («АБ ИнБев Эфес» АҖ) оештырган «Җаваплылык» Бөтенроссия акциясе кысаларында уза.

Проектның төп юнәлешләренең берсе-«Твоя мера — 0 промилле» белем бирү-агарту кампаниясе кысаларында юл хәрәкәте иминлеген тәэмин итү һәм исерек машина йөртүчеләр катнашында юл-транспорт һәлакәтләре санын киметү. Акция автомәктәпләр өчен укыту модульләрен эшләүне, машина йөртүчеләр өчен төбәк активлыкларын уздыруны, компаниянең 11 төбәгендә эксперт түгәрәк өстәлләре оештыруны күздә тота. Икенче юнәлеш — «Чара белергә кирәк» -тулаем алганда алкогольне җаваплы куллану культурасын үстерү буенча мәгълүмати-агарту кампаниясе.

ТР буенча Эчке эшләр министрлыгының ЮХИДИ идарәсе башлыгы урынбасары Дамир Бикмөхәммәтов түгәрәк өстәл барышында билгеләп үткәнчә, 2025 елның 10 аенда исерек машина йөртүчеләр катнашындагы юл-транспорт һәлакәтләренең гомуми саны кимүгә карамастан, мондый аварияләрдә һәлак булучылар саны кимеми. 

– Агымдагы елның 10 аенда Татарстанда 2704 юл-транспорт һәлакәте теркәлгән, аларда 275 кеше һәлак булган һәм 3258 кеше зыян күргән. Узган ел белән чагыштырганда юл-транспорт һәлакәтләре саны 2 очракка арткан, һәлак булучылар саны 18 булган һәм яраланучылар саны 43 кешегә кимегән, - дип сөйләде Дамир Бикмөхәммәтов.

«Твоя мера — 0 промилле» социаль кампаниясе Татарстанда старт алды инде. Кампания кысаларында машина йөртүчеләр өчен интерактив чаралар, автомәктәпләрдә тематик фильм күрсәтү һәм масштаблы мәгълүмати эш планлаштырылган.

Проектның географиясе киң: Владивосток, Волжский, Иваново, Казан, Калуга, Клин, Новосибирск, Омск, Уфа, Саранск, Ульяновск.