Татарстанда «Кадрлар» илкүләм проекты буенча быел 5 меңнән артык кеше яңадан укытылачак

«Кадрлар» илкүләм проектының «Мәшгульлеккә ярдәм итүнең актив чаралары» федераль проекты кысаларында татарстанлылар яңа һөнәрләр үзләштерә ала, дип хәбәр итә ТР Хезмәт, халыкны эш белән тәэмин итү һәм социаль яклау министрлыгы матбугат хезмәте.

Бүгенге көндә Томск дәүләт илкүләм тикшеренү университеты тарафыннан җиде белем бирү программасы тәкъдим ителә: 1С белгече, оешмалар өчен веб-сайт һәм мобиль кушымталар UI-дизайны, оешмаларда мәгълүмати куркынычсызлыкны тәэмин итү, пилотсыз авиация системалары операторы, пилотсыз авиация системаларын очуга әзерләү һәм идарә итү, предприятие экологы, экскурсовод (гид) һ.б.

Әлеге белем бирү программаларында көндезге бүлектә дә, дистанцион рәвештә дә укырга мөмкин. Укыту апрельнең икенче яртысында башланачак. Быел Татарстанда 5089 кешене укытырга планлаштырыла. Эшчәнлек өлкәсен үзгәртергә теләүчеләр хезмәт базарында ихтыяҗ зур булган һөнәрләр (алар 360тан артык) исемлеге белән танышып, үзләренә туры килә торганын сайлый ала.

Уку өчен гаризаны балалары мәктәпкәчә яшьтә булган эшләми торган әниләр, эшсез калу янаган хезмәткәрләр, 50 яшьлек һәм аннан өлкәнрәк (һ.б.) гражданнар бирергә хокуклы. 2024 елдан инвалидлыгы булган, шулай ук бала карау буенча ялдагы гражданнарның да шундый мөмкинлек бар.

Мәгълүм булганча, моңа кадәр гражданнарның аерым категориясен яңа һөнәрләргә укыту «Демография» илкүләм проектының «Мәшгульлеккә ярдәм итү» федераль проекты кысаларында оештырылды. 2019-2024 елларда Татарстанда 40 меңгә якын кеше яңа белгечлекләр үзләштергән. Үткән ел 4 385 кеше белем алган. Алар IT- һәм SMM-белгечләргә, маркетплейс менеджеры, психолог, логист, бухгалтер, интерьер дизайнеры, график дизайнер, нутрициолог (һ.б.) булырга укыган.

Чыганак: Татар-информ