Татарстанда коточкыч фаҗига: җиңел машина йөк автомобиле белән бәрелеп, дүрт кеше һәлак булган

Фаҗига Олы Подберезье авылы янында, Казан юнәлешендәге 709 нчы чакрымда булган.

Беренчел мәгълүматларга караганда, Hyundai маркалы җиңел автомобиль «Валдай» йөк машинасы астына килеп кергән. Көчле бәрелеш аркасында җиңел машинадан берни калмаган. 

Җиңел машинада булган дүрт кеше вакыйга урынында ук һәлак булган. Йөк машинасы йөртүчесе зыян күрмәгән. Хәзерге вакытта һәлак булучыларның шәхесләре ачыклана.

Татарстан Дәүләт автоинспекциясе мәгълүматлары буенча, 1993 елгы җиңел машина йөртүчесе, якынча фаразлар буенча, куркынычсыз тизлекне һәм дистанцияне сакламаган, нәтиҗәдә йөк автомобиле белән бәрелешкән.

Һәлакәт урынына оператив хезмәтләр, шулай ук Кайбыч районы прокуроры Игорь Осипов килгән. Вакыйганың барлык шартлары ачыклана, тикшерү бара.

Әлеге фаҗига юлларда куркынычсызлык кагыйдәләрен үтәүнең никадәр мөһим булуын тагын бер кат искәртә. Югары тизлек һәм игътибарсызлык кайчак төзәтеп булмаслык нәтиҗәләргә китерә.