Татарстанда сайлау участокларында 28 мең сайлаучы грипптан прививка ясаткан

Бу хакта Татарстан сәламәтлек саклау министрлыгының матбугат хезмәте хәбәр итте.

Республикадагы сайлау участокларында барлыгы 138 вакцинация пункты эшләде.

Якшәмбе көнне, 14 сентябрьдә, Татарстанда бердәм тавыш бирү көне узды. Республика халкы Татарстан Рәисен сайлады. Шулай ук 18 нче Мәләкәс округы буенча Дәүләт Советы депутатын һәм 7,5 меңнән артык муниципаль депутатны сайлау оештырылды.

Татарстан Рәисе сайлауларында дүрт кандидат (алфавит тәртибендә) катнашты: Рөстәм Миңнеханов («Бердәм Россия»), Хафиз Миргалимов (КПРФ), Виталий Смирнов («Социаль гаделлек өчен Россия пенсионерлар партиясе») һәм Руслан Йосыпов (ЛДПР).

Муниципаль сайлауларда 11,4 меңнән артык кандидат катнашты, алар арасында – төп партияләр вәкилләре һәм 2,6 меңнән артык үз-үзен тәкъдим итүчеләр. Барлыгы 2752 сайлау участогы 7.00 сәгатьтән 20.00 сәгатькә кадәр эшләде.