Татарстанда хәрбиләргә музей һәм театрларга бушлай керү мөмкинлеге бирелергә мөмкин

Тиешле карар проекты хәзерге вакытта коррупциягә каршы экспертиза уза. Документ нигезендә, ташлама дәүләт музейларына һәм музей-тыюлыкларга, шулай ук дәүләт театрлары, филармонияләр һәм циркның репертуар чараларына кагылачак.

Музейларда бушлай билетлар даими экспозицияләргә һәм вакытлы күргәзмәләргә биреләчәк. Театрлар, филармонияләр һәм цирк өчен һәр чарада тамаша залындагы урыннарның кимендә 10 проценты күләмендә бушлай билетлар квотасы билгеләү планлаштырыла.

Шул ук вакытта ташлама экскурсияләргә, түләүле лекцияләргә һәм мастер-классларга, гастроль чараларына, шулай ук башка оешмалар үткәрә торган түләүле чараларга кагылмаячак.

Бушлай билет алу өчен махсус хәрби операция катнашучысына шәхесен һәм тиешле категориягә керүен раслаучы документлар яки «Дәүләт хезмәтләре» порталындагы QR-код кирәк булачак. Гаилә әгъзаларына исә туганлыкны раслаучы документ та күрсәтергә туры киләчәк.

Бушлай керү мөмкинлеге бирә торган мәдәният учреждениеләре исемлеген Татарстан Мәдәният министрлыгының рәсми сайтында урнаштыру планлаштырыла.